حليم المداني إثري شاعر أمازيغي صاعد يكتب : “tameṭṭut tameqqṛant”

مشاهدة
أخر تحديث : الأحد 9 ديسمبر 2018 - 1:22 صباحًا
حليم المداني إثري شاعر أمازيغي صاعد يكتب : “tameṭṭut tameqqṛant”

سلوان سيتي

حليم إثري شاعر أمازيغي صاعد يكتب : “tameṭṭut tameqqṛant”

D ict n tmeṭṭut temɣaṛ.teddar aṭṭaṣ n iseggʷusa xef tma n yeɣẓaṛ,teṭṭef deg ixef nnes s ixef nnes d tzemmar das d isqad bu ijenwan zi tewwuṛa n ujenna.

tezdeɣ deg ict n taddart maṛṛa tenxaṛṛem,ixxamen nnes maṛṛa wḍan icca iten rmessus.mani mma tṣewḍed d ixemrawen.

Kkint xafs aṭṭas n tfeqqaε di tudart nnes,teẓẓiḍeṛ i isemmiḍen d wenẓaṛ.mkur twara ad xafs iḥmel yeɣẓaṛ war tt itiwi.

tejja d abarru n taṛwa nnes maca min umi ?am xmi war ten d tejji!maṛṛa mzellaεen,maṛṛa ttun tt qaε war dasen tecqi,Jjin tt teddar d tayujilt.

War daysen bu wul nni yellan deg yiwdan,mli daysen ul iri war tt tejjin ad tru ad tettar ɣar ayt bab n dcaṛ.ayt bab n dcaṛ ggin days ɣezzu,tettar ɣarsen tasekkift n waman ḥuma war tmetti s fad i teffud.ḥuma ad as wcen ad tsu deḥḥcen xafs,tmaṛḍnen i yinni umi tezzilliz d yinni xafs iksin imunas.kkaren tfafan xafsen di dcaṛ tettan asen rmuxx qqaṛen asen:jjem tt ad temmet tenni tewsar ar ami tugi ! Min umi tudart nnes ? Min daneɣ tewca ? uca tṛajan mermi ɣar temmet nettat tugi ad temmet.

mkur twara iri kkin xafs ad sren ma tarra ca n tneffut ma walu ! Ca n twaratin ɣeṭṭṛen xafs ula d tawwaṛt wi dasen ɣa yinin lla? ttedfen ttafen tt εad teddar uca iri dewlen ad bbyen iseqsan deg ayen jar asen.minzi teddar ta ? aman war das newci ca! Yak ma tasen d ɣars taṛwa nnes

War ten nẓaṛ?!

aɛmud rid deg ayt bab n dcaṛ, aεmud min d tejja. ttun tt, ksin tt d aseḥqaṛ. war das qqaṛen ɣarneɣ yemmatneɣ ad xafs nessij ad tt nẓaṛ.

Tejja iten d,tssemɣaṛ iten d nitni ḥaṛten xef yixef nsen uca kkin ssin.maṛṛa mana a war ssinen azal n tyemmat,itɣil asen tudart mbla tayemmat aha waha,war ssinen belli d tameεεissut,d tameqqaṛṣut,tɣima d tazyent.

Ca n taṛwa nnes iwta iten rḥar ɣar uzellif,aṛeẓmen d tiṭṭawin,faqen d zeg uɣḍaṣ n yiḍeṣ tuɣa di ɣeḍsen.amen cemmzen di tqiccat n umeṛɣiɣ nnan:mani tella yemmatneɣ?

Kkaren bedden xef uḍaṛ nsen syidden reḥnuḍ ggin iṣuṛaf imezwura uca bedden s txecfin dasen ssizzaren deg ubrid.

ṛuḥen wussan usin d karren d wayyawen,mkur twara iri ikkasen d uneɣmis ameẓẓuɣ belli yemmatsen tameqqṛant εad teddar.ggin min ɣarsen d tizemmar,ḍfaṛen tabridt n ibabaten nsen war issiweḍ webrid.sseqsan xafs,arzun xafs,ar ami tt ufin. Umi tt ufin sḥinnben as,sqiccmen as,ssemɣaṛen zzays…tuca s tumert (refṛaḥett) nni zi εemmaṛṣ war tuci.

Ssentan mkur twara ad as d sqaden iṣulditen zi ɣar temkabar ,tedwel tbedd xef iḍaṛen nnes,tedwel itt id cwayt n temẓi,tebda tεeddel deg ixxamen nni iwḍan.kkin d ssin ayt bab n dcaṛ,ẓṛin tt,tbehḍen! mamec das tegga ta ?,

Tuɣa war das iqqim walu ad targeb!,rexxu tedwel teqseḥ tɛeddel deg ixxamen nnes nnit ?!

awaren i ca n wussan tcarz,teẓẓu zi min itidar yires.maca xmi tṛaḥ ad temjar tettaf izzaren as ayt bab n dcaṛ.ufin days heddu s uya dcaṛ tuɣa irqef it razaɣ.tufa amenni tebda ttzawar iten,ttnaqam iten,teqqaṛ asen:war lli ad teqqimem tmejjarem waha,ẓẓum ula d kenniw cwayt ḥuma ad tafem cenna mala temjarem.

umi ufin amenni ḥaṛcen ɣars deg ict n tmeddit ɣar rwaṣṭa n djiret,kkʷtin xafs,sḍaɣṛen tt zi sin (tnayen) n tiṭṭawin ,ḥewwsen as maṛṛa min ɣars d tammuṛt,tedwel war tessin ayyawen nnes zeg ayt bab n dcaṛ.ayyawen nnes xafs iksen afray n tzura di tuɣa tella usin d ar ɣars ad arzun xef tseqqaṛ nsen war ufin ca,ufin ḥa tzawa.

Yemmatsen tameqqṛant tedwel war ten twili.minzi ten ɣa twala? qa sḍaṛeɣren tt zi tnayen n tiṭṭawin,maca war ten tettu ca aqaten ɣars di twangimt εizzen xafs,teεqel xafsen ijj ijj.ula d nitni snen mindin!, snen rid d nettat i ixsen,snen war ɣars ca deg ufus nnes.s uya war days smiḥen ca qqimen amenni texsen tt d buḥbel nsen,traɣan as:yemmatneɣ tameqqṛant.

 

Halim El Madani

Tessenta deg wass n 6 zi dujanbir

Tenfarar deg wass n 7 zi dujanbir

zeg useggʷas n (2018)

رابط مختصر